《圖書館戰爭:最後任務》感想
唔打算劇透太多,主要今集劇情唔係話多到難以消化。
電影一開始用零碎片段略略回顧翻前作嘅世界觀,
再用一場"搬書"行動展示圖書隊同良化隊之間嘅"槍戰",
一開波已經係大場面,絕對震撼。
正式開始劇情嘅時候主要續翻SP《Book of memories》留下嘅伏線,
詳細解釋SP最後段手塚慧開始嘅「未來計(企)劃」行動以及背後嘅理念。
而未來計劃嘅目的係要將整個圖書館圖書隊納入政府文部科學省,
藉此與同屬政府隸下良化特務機關嘅良化隊可以平起平座交涉,
減少"無謂"嘅戰爭以及無辜犠牲,以達致"世界和平"嘅理念。
不過呢個做法係同圖書館最初成立嘅目的背道而馳,
因此手塚慧想盡辦法要消滅圖書隊防衛部削減其勢力令圖書館可以納入文科省。
與此同時關東圖書隊因為一個名為「致未來的自由展」嘅展覽而要借出全世界僅餘一本,
講述圖書館自由法,甚至係圖書隊成立嘅原點嘅"禁書"。
因為係好重要嘅一本書,所以同時亦派出全隊特種部隊黎保護本書。
誰不知去到中間站水戶圖書館時被良化隊搜查,關東圖書隊按照慣例拒絕搜查而開戰。
最初開戰時間定為一小時,但良化隊喺限定時間後並無收手,而且仲加強火力。
原來水戶圖書館嘅書已經被政府"收購",良化隊以取回政府財產為由繼續戰爭,
然後發現原來水戶圖書館一直屈服於良化隊之下交出所有"禁書",
禁書庫只有數本"禁書",館長甚至認同未來計劃嘅理念。
原來呢場大龍鳳係手塚慧設法消滅圖書隊防衛部嘅一條好橋,
要消滅防衛部最直接嘅手法就係要消滅其特種部隊,
到時輿論同人民都會覺得圖書隊無力間接迫圖書館納入文科省。
圖書隊陷入苦戰,圖書隊最大原則係唔可以殺人,所以最多都係射向腳部,
但良化隊唔理三七廿一總之見人就"殺",最後特種部隊都係要放棄水戶圖書館,
不過真正最後嘅任務係要將嗰本"禁書"送到展覽場地,因此派出笠原同堂上去護送呢本書到展覽場地。
途中十分艱巨,良化隊一見到二人連有無批准可以喺市區開槍都懶理總之開左槍先就係,
堂上被射中數槍倒下,最終交由笠原成功運送"禁書"到展覽場地。
好多細節唔講了,太多字唔係路,呢套電影無疑係揼本之作,場面比第一集大規模同震撼好多,
呢套仲係日本本土第一套真正7.1全景聲混音嘅電影,可見其重視程度係去到一個點。
睇完套片之後真係完全明白點解香港會得三間戲院上映,題材敏感都係其次,最大嘅問題係,
當你睇住佢畫面同聽住佢啲對白嘅時間,真係覺得雨傘革命同魚蛋革命重新展現喺你眼前。
雖說畫面有”BUG”,但呢啲”BUG”正正體現出一種心態,”紀律”部隊對命令為命是從;
明明人地唔會殺得到你但係你當佢地好似殺父仇人咁殺法;
當有班人為捍衛你地嘅自由不惜一切去戰鬥但係你地只係對住螢光幕無任何感覺;
對住手無寸鐵嘅人你都當規矩無到照開槍,只要可以完成指令就係......
睇緊呢套戲嘅時候個心真係好悶悶不樂,電影入面嘅情節一早已經喺香港發生,
有陣時真係現實比電影更加荒謬,到底有幾多個人係真係睇完呢套戲嘅時候會諗吓而家嘅香港?
有幾多人係會去入場睇呢套戲?有幾多個人係睇完插呢樣插嗰樣但係無諗過喺香港已經發生?
呢套戲非常適合仲有獨立思考能力嘅你去睇,如果你仲自認係一隻豬咁真係好應該去睇,
但係如果你唔認係一隻豬但係做嘅野同豬無分別嘅咁你都係晒無謂錢去睇翻啲乜乜風雲啦。
呢套戲如果齋睇場面都已經值回票價,都係嗰句, 好戲真係需要實際支持,
唔係嘅話以後你想睇都未必有得睇。
最後到評分,
劇情&場面 54/60
配樂&混響 18/20
選角 18/20
總分:90分
