[劇透注意] [唔稱得上影評,我無咁嘅級數] [死忠的一篇平反文]
終於有幸地睇到《四月是你的謊言》嘅電影版,其實亦係剛過去嘅個人東京之旅其中一個主要嘅目的,
睇之前係非常之擔心,因為套戲出完黎之後勁多人係只彈不讚,想搵一個人讚呢套戲都好難,
再加上多間戲院安排場次非常之少,好怕套戲會係啲人講到咁差。
只不過在下係《四月是你的謊言》嘅忠實fans,甚至係死忠,漫畫睇左動畫亦睇左,
所以就算電影真係好差都好,點都想睇一次親眼目睹證實一吓有幾差,於是旅程第一晚就去左睇。
結果個人覺得並唔係旁人講到咁差,反而有種意外嘅滿足感,點解會咁?同大家講解一吓在下自己心目中嘅睇法。
首先係畫面,無用到時下傳統電影嗰種調色,比較用翻貼近生活嗰種色彩,
感覺係自然到真係好似自己去左嗰個地方親眼睇景嘅感覺,
畫面嘅細緻度係細緻到目不暇給,啲櫻花靚到直頭可以做wallpaper。
音樂方面,雖然作曲並無動畫版嗰位作曲家橫山克嘅水準咁高,之但係吉俣良嘅音樂亦唔差,
帶得出《四月》嗰種感覺,比較適合靜落黎聽,篠原悠那負責嘅小提琴同鋼琴部份亦算合格。
場景以及劇情方面,開場嘅引子做得幾好,配合埋結尾完全做到首尾呼應。
而場景同劇情因為時間篇幅問題改左唔少,但係其實已經盡量去做還原,
例如有還原到公生同薰初次相遇一幕、音符突然消失嘅感覺、夜晚一齊唱twikle twinkle little star、一齊跳落河、晚上闖入學校課室等。
而且劇本主線部份以及人物做事嘅目的其實都盡力去保留到,雖則話有原作人物被cut走左,但係篇幅問題係應該要咁做。
劇本嘅主力集中喺薰對公生嘅影響、傳遞心意嘅感覺以及公生嘅內心世界同想法,呢點其實都同原作主線係一致。
如果真係要話做得唔夠好的話,個人認為有四點,
第一點係比較少篇幅去鋪排宮園薰有病一事,
因為原作由一開始編佢喺初次合奏後突然暈底左從而鋪排佢有身體有問題,
電影並無做佢暈底一事,而係編佢同公生決定參加第二次嘅合奏後並無出現先開始帶出佢患病一事。
第二點係公生嘅獨白唔算多,有啲位置應該插入嘅原作獨白無左,感覺最深刻係「夢之合奏」完後句"さようなら"
同埋最後一幕"もうすぐ 春が来る、君と出会った 春が来る、君がいない 春が来る"呢兩句無左,感覺有點美中不足。
第三點係原作入面"reset"一事電影並無講到出口,
不過電影有做到薰講"如果我哋無遇見過可能會更加好"一幕,只係對白上夾唔到封信提及"不要reset"一詞。
第四點係電影最後無做到原作裏面公生同薰喺5歲時嘅"合照",但係電影用第二個手法,喺劇中間做左張"現在"嘅合照。
多個場景同鋪排變換之下,觀感確係唔同左,但係煽情位依舊係做到出黎,在下自己睇到最後場鋼琴演奏嗰陣其實本身只係預佢平淡地帶過,
點知最後有還原到原作嘅「夢之合奏」一幕,當見到呢幕嘅時候真係好感動,無諗過佢真係做左出黎,
演奏完左之後其實自己嘅眼淚已經開始忍唔到流緊落黎,直到最後薰讀出留比公生嗰封信,再加上主題音樂配合,淚腺完全徹底地崩潰,
嗰個樣如果比其他人當眼見到實會嚇到傻,好彩係自己一個人去睇。無記錯的話封信嘅內容同原作幾乎一致,只係無左5歲合相嗰一句。
總括黎講前後應該有4個位在下係流左眼淚甚至喊左出黎,睇完套戲嗰晚真係變左隻熊貓。
主題曲歌詞太貼題,完全配合到電影嘅內容。
選角合格,廣瀨鈴完全演活到宮園薰呢個角色,山﨑賢人演繹到公生有型中帶點頹廢嘅感覺。
今次旅程睇到呢套戲,實在無悔,畫面已經值回票價。
只係心入面有個想法:到底跟風話插呢套戲差到貼地嘅人有無睇過呢套戲?到底班人講唔講得出套戲咩地方做得差或者唔夠好?
最後係評分
劇情&編排:38/50
畫面&場景:18/20
音樂&主題曲:16/20
選角:8/10
總分:80分
