[嚴重劇透注意!!]
一場早已注定的命運之戀
都已經一段時間無寫文,今次呢套電影睇完之後真係唔可以唔落筆寫翻幾句。
呢套電影,係自己上年年尾最想睇嘅一套電影。
電影改篇自七月隆文同名小說《ぼくは明日、昨日のきみとデートする》,
故事講述一名大學生－南山高壽喺返學時嘅一架電車上對一名女生－福壽愛美一見鐘情,
喺愛美落車後高壽立即緊隨追上,並直白說出一見鐘情一事,想問愛美拎電話號碼,點知愛美係無手提電話,
交談中得知原來兩人都係20歲,分別時高壽問愛美「我哋會唔會再見?」,愛美突然落淚,然後回答「嗯,我哋會再見」。
第二日,高壽搭車返學嘅時候並無見到愛美。晏晝喺動物園長頸鹿下畫畫嘅時候,愛美突然出現喺高壽面前,
於是兩人就一邊行一邊傾計,到左河邊前,高壽透露自己5歲時曾經喺該位置浸親,好彩有救命恩人相救,
同時間愛美搭話指自己5歲時亦差啲有生命危險。臨別時大家終於交換到聯絡方法。
晚上,高壽喺好友上山正一嘅鼓吹下打電話畀愛美,並相約第二日一齊出黎睇戲。
第三日,睇戲前高壽做定準備睇戲前會去咩地方行,然後直到二人一齊睇完戲之後都一切順利。
到左夜晚,二人走到一棵樹前,高壽向愛美提出交往嘅請求,愛美亦答應左請求,自此,兩人每日都會出黎約會。
某日,高壽終於搬新屋,愛美當然亦有幫忙執捨物件,無意中發現一個盒仔,
高壽隨即解話「個盒係之前提過嗰位救命恩人喺我10歲嘅時候畀我嘅,佢話當第日我有拖拍嘅時候就會黎同我一齊打開呢個盒」。
之後其中一日閒話時高壽話「愛美好似有超能力咁,第二日嗰陣居然知我喺動物園」之類嘅說話,
愛美回應話「如果我話我知道你嘅未來嘅話,你會點做?」......
兩人嘅發展一直都非常順利,只係愛美總係喺某啲意想不到嘅時候隱隱哭泣。
大概到左第十五日,愛美漏低咗一本筆記簿喺高壽嘅屋企,高壽揭開黎睇,發現入面嘅內容非常奇怪,
第一頁上面寫住「我的第1天(對高壽來說是最後一天) ...」,
後面幾頁分別係「我的第2天(對他來說是第29天)...」「我的第3天(對他來說是第28天)...」......
無耐就收到愛美嘅電話「你係咪已經見到本筆記簿?我有件事一直隱瞞住你,聽日朝早6點,喺你學校嘅課室等,到時記住要帶埋嗰個盒黎」。
第十六日,高壽如時赴約,愛美用手上嘅鎖匙打開左高壽手上嘅盒,裏面收埋嘅係一張相,上面有高壽、愛美以及高壽父母嘅一張合相。
愛美解釋,張相係喺不久嘅將來影,「如果我話有另一個世界存在嘅話,你會唔會信?而我就係喺嗰個世界黎」。
愛美向高壽講解一切,解釋整件事嘅來龍去脈。
實際上兩人係存在喺唔同嘅世界,假設高壽嘅時間係順流,咁愛美嘅時間就係逆流;相反假設愛美嘅時間係順流,高壽嘅時間就係逆流。
而對高壽黎講嘅『明日』其實係愛美嘅『昨日』,即係話以現在黎講高壽聽日所見到嘅嗰個愛美其實係過去嘅愛美,調轉黎講亦係一樣。
兩人所身處嘅兩個世界,每隔5年先會有30日重疊,每5年先會有30日嘅時間可以同對方相遇。
高壽5歲嗰年浸親,救佢嗰個人其實正正就係35歲嘅愛美,10歲時係由30歲嘅愛美手上收到嗰個盒;
而愛美5歲嗰年差啲喺火場遇上生命危險,查實就係35歲嘅高壽救左佢。而愛美15歲嗰年,25歲嘅高壽會去搵佢並且將二人20歲拍拖嘅事一五一十向15歲嘅愛美講,
嗰本筆記薄上所記述嘅事正正就係15歲嘅愛美根據25歲嘅高壽口中得知而記下。
高壽最初得知呢件事嘅時候感覺有種被欺騙了嘅感覺,因為原來大家一齊過嘅日子,自己聽日所見嘅愛美係唔會知道,
但係當冷靜落黎諗深一層先發覺,原來自己一開始所見到愛美莫名地喊其實同樣係咁難受,原來自己好多好多嘅第一次對愛美黎講係最後一次,
高壽終於明白到愛美哭泣背後所隱藏嘅意義,所以決定好好珍惜兩人最後能夠喺埋一齊嘅時光。
喺第三十日,兩人相處最初亦係最後一日,愛美黎到高壽間大學嘅畫室做model,高壽為愛美畫下一幅掃描畫,
同時向愛美詳細講述到底呢30日間發生過啲咩事,好讓愛美有個心理準備到底之後應該點做。
而最深刻嘅一句對白,應該就係愛美嗰句「從今之後,我同你會慢慢唔再係戀人關係呢」。
------------------------------------分割線------------------------------------
其實套戲應該到左呢度就結束,但係監督似乎意猶未盡,決定補多幾筆落去,順序補翻幕高壽25歲去搵15歲嘅愛美時嘅情景,
當時高壽手上拎埋一幅畫去搵愛美,幅畫正正就係愛美20歲時,即係高壽20歲時同愛美相處嘅最後一日所畫嘅掃描畫。
然後再補翻高壽35歲時喺火場救5歲嘅愛美時嘅畫面。
你以為套戲就咁就完?未完呀!!
監督仲要再用翻愛美嘅角度,以愛美嘅時間再一次重溫翻呢30日嘅順序,到左第30日亦即係高壽嘅第一日,臨別時高壽問嗰句「我哋會唔會再見?」,
明明愛美唔會再同呢個時間嘅高壽見面,但係就要瞞住高壽答「嗯,我哋會再見」,之後強忍淚水衝上電車,整個人如精神崩潰般大哭。
呢一幕,真係極之唔爭氣地喊到傻,成套戲,最虐並唔係高壽嘅最後一日,而係高壽嘅第一日同愛美嘅最後一日,呢個首尾呼應實在做得太過漂亮。
電影中間嘅伏筆真係非常耐人尋味,就算套戲睇完之後個人都會覺得意猶未盡,要再翻睇第2次第3次。
最初對呢套電影有興趣,應該就係因為見到條預告片係喺京都取景,再加上題材亦係自己平時較鐘意嘅類型黎,
見到預告片慢慢咁流出,就開始睇左少少小說,不過未有時間睇晒就真嘅...最感興趣嘅係關於"時間"呢個謎團。
即使一早知套戲嘅秘密同"時間"有關都無諗過會係咁樣玩法,橋段可能同其他作品有少少相似,但係實際上卻異常地不同。
套戲仲有好多細節位好值得留意就唔多講啦,真係無咁多時間同你逐個逐個shot慢慢講。
不過淨係睇左少少小說都知道,其實套電影真係改左好多位,如果要話貼近原著可能漫畫會比較貼近啲,
只係監督有心得黎真係好黐線,啲煽情位做得太到位,
真係夠膽講,個作者黐線,寫劇本嗰個更黐線,監督係更更更黐線。
其實由頭到尾,故事最慘嘅人可能都係女主角愛美,因為就算點計都好愛美都係由一開始就知道曬成件事,
由30日旅程正式開始嘅時候對住一個咩都知嘅高壽慢慢再面對一個咩事都唔知嘅高壽;
相反高壽係由唔知變知,去到30日旅程嘅最後一日面對住嘅愛美都總算對件事略知一二,唯獨係呢點點都無得兩個人調翻轉黎講,
愛美去到最後難受嘅程度,絕對比高壽高出好多倍。
一個以為係因為巧合而展開嘅故事,原來所有嘢都係命中注定,呢份感動,大概就係呢個故事最動人嘅地方。
難得一個故事講晒所有秘密畀你知都仲可以舖伏線,直到最後將所有"催淚彈"引爆,喺電影裏面呢個故事真係非常之完美。
套戲嘅音樂,尤其係最後講翻女主角自己嘅順序嗰幕所用嘅main title,真係好容易會令人喺腦海回味翻睇套戲時嘅感覺。
唯獨可惜嘅係呢本原作小說並未有中文版,所以即使係台灣會唔會有機會上映都成問題,更加唔好話香港...
近年日本真係拍咗好多好電影出黎,黎緊2月會有《君と100回目の恋》(與你的第100次戀愛)以及《一週的朋友》電影版目測都會幾好睇。
今次旅程能夠睇到呢套電影,真係實在太好了,無悔為左呢套電影9衝趕行程,更無悔刷咗兩次,真係好希望快啲睇到第三次,
如果香港可以上映的話,真係第一時間會走去睇第三次,唔需要再諗。
順帶一提:福士蒼汰演技真係進步左。
最後循例評分
劇情&鋪排:48/50
畫面&場景:18/20
音樂&主題曲:18/20
選角:8/10
總分:92分
