睇完晒兩集《花牌情緣》嘅電影版,感覺唔錯
同原作相比改動其實都唔少,以電影篇幅黎計有改動係無可避免,
好彩嘅係電影公司肯分上、下集出,令成個故事能夠更加細緻地展現喺觀眾眼前,即使有改動故事處理上亦係非常流暢。
喺改動之下全部人物角色嘅動機都巧妙地得以保留,似乎劇本落左唔少苦功,順帶一提:劇本同監督係同一個人做。
畫面調色非常自然,特別係樹葉嘅綠色真係好養眼。
場面處理方面亦令人容易投入競技花牌嘅世界,即使唔識玩花牌亦會感受到當中嘅壓迫感。
橫山克負責嘅音樂令電影增添左不少色彩,替電影各情節增加左一份感染力,主題音樂可以用洗腦黎形容。
電影唯一一樣做得唔夠好嘅係對競技花牌嘅解說並唔係太詳盡,但係篇幅問題,呢點可以接受,
睇過原作/動畫嘅觀眾唔洗好似由零開始咁睇其實更容易技入電影嘅世界,
至於無睇過嘅觀眾如果有興趣想知更多可以去睇翻原作/動畫了解更多。
廣瀨鈴演技非常之好,即使面對原作各種顏藝嘅位置亦能夠非常自然地做到,完全無嗰種over晒或者浮誇嘅感覺。
野村周平嘅演出亦都OK,其餘若手演出亦交足戲,上白石萌音亦演繹到角色對百人一首熱愛嘅程度。
電影上之句片頭以及下之句片尾有非常大嘅想像空間去發揮(有留心睇會發覺係同一段野黎),
據講喺下之句上映嗰陣公布左電影會開拍續篇,如果成事的話真係要繼續睇埋落去。
整體黎講呢套改篇電影算係高水準作品,原作fans亦可以放底包袱去睇,整體上係滿意,由各細節睇得出呢套係劇組誠意之作。
最後評分
劇情&編排:46/50
畫面&場面:18/20
音樂:18/20
選角:8/10
總分:90分
