翻拍"大熱"作品,再次顯現劇本的重要性
以原作動畫劇本改篇,富士電視台另一搞作《好想大聲說出心底話》推出真人電影。
由動畫《未聞花名》幕後班底－超和平Busters(長井龍雪、岡田麿里、田中將賀)再度合作而推出嘅動畫電影《好想大聲說出心底話》,
當年食住《未聞花名》個勢上映前已不停以"《未聞花名》原班人馬又一力作"作宣傳,
為配合宣傳,富士電視台更將《未聞花名》劇本改篇拍攝真人特別劇於動畫電影《大聲》上映後兩日播出,
劇集《未聞花名》中更有當時為動畫電影《大聲》聲演女主角成瀨順之配音員水瀨祈客串演出,可見當年富士電視台同Aniplex玩得有幾盡。
事隔兩年,富士電視台聯同Aniplex再度以原作動畫劇本改篇,將《好想大聲說出心底話》拍攝真人電影。
但好可惜,票房成績與當年動畫電影上映時相比相差甚遠,到底為何兩個版本反應落差會如此大?
前兩日睇完呢套電影嘅我或者可以嘗試分析呢個問題嘅答案。
首先,認真咁講,個人認為《好想大聲說出心底話》本身套動畫電影嘅劇本真係寫到唔稱得上叫好,
實際上可能當年好多人只係聽到《未聞花名》幕後班底嘅名氣而走去睇呢套動畫電影,
我亦係其中一員,只不過睇完之後個人覺得成個故事實在有點兒那過...個感覺就好似畀人整蠱完咁...
絕對會有人係當年睇完動畫電影後唔會想再睇呢套真人電影。
其次,有啲人淨係會睇動畫而唔會走去睇戲劇,呢套電影顯然係食唔到呢類人嘅水,
而且要一向發行動畫嘅Aniplex負責真人電影嘅配給,手法上難免會同傳統電影公司有落差。
最後,亦係最重要嘅一點,電影劇本過份"忠於原著",忠於原著本來唔係錯,
但係要留意翻本身"原作"片長已經係119分鐘,真人電影片長係118分鐘,
而喺相若嘅片長之下,假如細節無太大分別甚至人物角色嘅一舉一動、橋段以及進展都幾乎相同的話,
睇過"原作"嘅觀眾難免會覺得沉悶,甚至會覺得成套嘢只係搬字過紙照板煮碗就算數,毫無新意。
事實上由頭到尾,真人電影同動畫電影情節上真係9成相同,餘下1成只係少幅度嘅變動。
雖然前面講到套真人電影好差咁,不過都有個小驚喜,
就係電影入面女主角媽媽嘅編排並無動畫版嘅行為咁過份,
而且電影裏面嘅媽媽嘅舉動更易取得觀眾嘅同情。
同樣以原作動畫劇本改篇真人影視片集,個人覺得《大聲》同《未聞花名》相比絕對係一件失敗作,
唔計本身故事質素嘅落差,《大聲》喺劇本處理上比《未聞花名》甚為遜色,《未聞花名》劇集至少懂得濃縮故事抽絲剝繭將重點搬出來,
《大聲》電影只將原作故事"照抄"片長相若連劇中音樂劇歌詞都同"原作"一致,雖則拍攝上難度比《未聞花名》高,
但綜合上文提及之問題只顯得《大聲》劇本無誠意。
(其實都已經唔想多講《大聲》套電影嘅調色一望落已經唔係青春校園劇feel,仲講咩希望...)
(動畫電影以及真人電影音樂部份同樣由橫山克負責,但真人電影入面明顯無直接用返動畫影嘅配樂,由此可睇得見個反差有幾大...)
結論係以劇本黎計其實《未聞花名》先至應該拍電影,如果呢套拍做電影的話個故事肯定能夠發揮得更好,事關《未聞花名》個故事可塑性比《大聲》高得多,
至於《好想大聲說出心底話》極其量只能拍一集特別劇。
只不過而家成件事調返轉咁出現已經勢成騎虎,只能婉惜。
(富士電視台都係準備執笠吧)
