[注意分界線]
這絕不是《你的名字。》,考究過後的平反文
「那年夏天,我確實和她一起經歷了好幾個『如果世界』」
「我明白自己是沒法逃脫的,但是,即使只有今晚,我都想和你一起」
《煙花,應該和誰看》(以下簡稱《煙花》),改篇自岩井俊二出道影視作品《煙火,應該從下看上去?還是從側面看過去?》。
《煙火,應該從下看上去?還是從側面看過去?》,原本是富士電視台單元電視劇《If 如果》的其中一集故事,
由於1993年播出後獲得廣大好評,岩井俊二藉此獲得日本電影導演協會新人獎,1995年經重新剪接後作電影版於戲院上映。
故事發生於一個海邊的小鎮─茂下(もしも),一個舉行煙花大會前的白日,
男主角島田典道與好友安曇祐介以及女主角及川薺於學校泳池內以游泳比賽的形式進行一場打賭,誰勝出誰就能夠要求對方做一些事情。
典道於比賽中因無法集中精神而擦傷左腳,結果為小薺第一、祐介第二、典道第三,於是小薺便相約祐介當晚一同去煙花大會。
典道和祐介回到課室後同學們都在爭論「煙花從側面看到底是圓還是扁的?」,最後一致決定從當晚煙花大會尋找答案。
下午,祐介看見典道的腳傷便叫他到自己家中的診所療傷而自己先行與同學們集合出席煙花大會,並託典道向小薺傳遞自己不會跟她去煙花大會的決定。
典道到了診所時發現小薺身穿浴衣並帶著行李箱而感到奇怪,傳話後得知原來小薺打算跟游泳比賽中勝出(即第二名)的人離家出走。
典道跟著小薺回到家時目睹小薺被母親強行拉回家的情形心感不忿,小薺的行李箱被掉到地上,裏面的物件隨著撞擊四散,物件中還有游泳比賽時小薺手持的玻璃球,
此時祐介等人剛好走到小薺的家前,典道無名火起向祐介用力伸出一拳並捨起那個玻璃球,心裏一邊想著「如果游泳比賽贏了的話」一邊拋出玻璃球......
轉眼間,時間回到游泳比賽,典道贏了,小薺相約典道出席煙花大會,典道對面前所發生的事感到奇怪,所有事都佛似曾經發生過卻帶點違和感......
這個世界,風車是逆時針方向旋轉,同學們依舊爭論「煙花從側面看到底是圓還是扁的?」,但對話的觀點似乎有點不一樣......
------------------------------------分界線------------------------------------
故事就講到呢度,畫面同對白表達嘅嘢實在太多,假如要將整個故事攝要寫晒出黎實在太費時,時間以及身體問題實在抽唔到咁多時間寫,
睇咗套戲嘅麻煩自己回想翻之後發生咩事,未睇嘅 套戲就快落如果有興趣唔該快啲去旺角百老匯睇咗佢。
(套戲本身唔算長,但係故事時間軸短得黎 90分鐘嘅片長入面太多point,如果只想睇攝要可以上各大電影網站望翻個簡介)
咁到底呢篇文仲有咩好講呢?當然仲有個人感受要講吓啦。
認真講句,最初睇完套戲係有少少一頭霧水,某程度上係因為結尾完得太過突然,相信唔少人睇完套戲都會有呢種感覺,不過又唔覺得套戲好似啲人講到咁差。
反覆思考之後就有個諗法:中間會唔會有啲細節自己忽略咗或者係畫面表達唔到?
於是第二日就走左去搵翻本小說黎睇,然後慢慢考究翻入面嘅細節位,發覺小說將典道嘅心境描寫得相當徹底,
同動畫裏面嘅表現手法完全係兩回事,只係動畫裏面嘅華麗畫面小說卻難以描繪。
小說同動畫嘅故事內容大致相同,不過亦有少少分別,至於個分別就唔詳談了,
睇完小說之後心底嘅疑惑全部解開晒,亦明白到故事中典道同小薺嘅想法如何,更深切地體會到故事背後想傳達嘅訊息。
故事嘅訊息其實好簡單:如果有件事你覺得非做不可的話好應該把握時間放膽去做。
一個成日聽而且簡單易明嘅道理,但奈何有幾多人睇完套戲之後會諗呢啲嘢,
可能好多人睇完呷兩句「完全唔知做緊啲乜」「垃圾戲一套」「浪費咗個半鐘唔知睇咗啲乜」就算,
無錯呢套係一套「文藝片」,係需要用少少腦去諗嘢而唔係咩都煮熟曬畀你食嘅戲黎。
又或者咁樣講,《煙花》係一套想引導你去思考嘅電影,最尾嘅開放式結局就係最好嘅證明。
假如你肯用少少腦去思考一吓套電影,又或者肯去睇翻小說版,你會發現呢套並不是一般人口中的「垃圾」。
對於電影,個人額外加分嘅地方其實有好多,
比如話故事,同「原作」相比個人比較偏向動畫版嘅佈局,動畫只有頭半小時以及尾段插曲《forever friends》響起時主角們一同落水玩係沿用「原作」設定,
「原作」並無動畫嘅拋波設定,更加無浮誇嘅煙花場面,
「原作」所描述嘅,係小薺被母親夾硬拉翻屋企之後,典道不忿地打咗祐介一拳,然後想像假如典道自己當時贏左場比賽之後會點,最後回望翻已成定局嘅現實有幾咁無奈。
動畫將「原作」嘅只係想像轉化成用行動去改變一切呢點,個人係非常贊同。
大根仁今次寫嘅呢個劇本,某程度上已經算係非常收歛,如果有睇開大根仁負責寫劇本嘅片集會知道,大根仁係好鐘意玩黃色笑話,
今次只係基於「原作」做咗兩三個場口有黃色話題已經算好厚道。
再者,大根仁今次嘅劇本能夠突破「原作」框架,以奇幻嘅方式去表達另一個世界,利用煙花四散嘅場面暗示邊一個係「如果世界」邊一個先係「真實世界」,值得一讚。
動畫搵黎SHAFT嘅物語系列班底製作,新房昭之做總監督,甚至搵埋神前曉負責配樂,因此人設、畫風甚至場景都會有些少物語系列嘅影子喺度,
雖然畫面細節上有少許不足,尤其係人物度用上3DCG嘅時候會顯得突兀,但係當睇到煙花場面嘅時候就明白到嗰種畫面真係需要搵呢個班底先做得出。
只不過動畫喺情感表達方面做得唔算非常突出,部份分鏡人物表情會略為生硬,如果有睇開物語系列會有相當嘅熟悉感。
配樂方面其實唔算突出,未睇套戲之前聽OST其實真係無feel,
配樂真係需要連埋套戲一齊黎又或者係睇完套戲先會出得到個感覺,因此只能算比合格好啲啲嘅水平。
劇中由廣瀨鈴(小薺嘅配音)翻唱嘅插曲《琉璃色的地球》配合埋電影嘅畫面,成件事好有童話嘅感覺。
而《forever friends》喺電影嘅最後起左個好大嘅作用,個人認為呢個位比起「原作」用上呢首歌時更加有張力,
另外個人亦都比較喜歡DAOKO翻唱嘅呢個版本而唔係「原作」當年嘅原唱版,可能我唔係嗰個年代嘅人啦...
主題曲《打上花火》非常好聽相信應該無人會反對,作為電影嘅主題曲,電影完結後播出呢首歌正好對劇中情節作出呼應。
(最癲嘅時期係試過將《打上花火》連續repeat幾十次)
有啲人可能會走去彈配音,話配音係災難級,見到呢啲迴響對我而言只係一笑置之,我嘅反應係:你哋班人肯定無聽過庵野秀明以讀書式「讀」出《風起了》啲對白。
須知道一點,東寶對呢套作品嘅方向定位係一套「電影」,因此搵演員黎配音亦係策劃嘅其中一環,個人認為男女主角分別搵黎菅田將暉同廣瀨鈴呢件事係無問題,
二人嘅表演真係唔能夠話以「災難」黎形容,極其量只可以話同專業配音員相比係水準之下 (菅田將暉喺技巧上確係差咗少少咁,不過真係唔係話聽唔落囉),
可能好多人都習慣咗一般動畫嘅誇張式聲演手法,一時間接受唔到啲演員用拍「電影」或者片集嘅技巧去講對白。
有樣嘢需要強調翻,一般而言,日本搵演員黎配音方面已經比起香港好得多,至少唔會好似香港咁有咬字不清嘅情況出現 (庵野秀明唔算係演員)。
老實講,最初未睇《煙花》之前係有少少擔心的,尤其係聽完最初啲人嘅評價同埋睇完「原作」之後就更加擔心唔知套戲會做咗啲乜出黎,
只不過亦都聽到一點"好多人睇完覺得比原作更加好睇"同時間主題曲嘅解禁亦令我嘅擔心減淡,川村元氣亦係一支強心針,套戲睇完之後發覺,原來之前一直以黎嘅擔心都是多餘的。
嚴格黎講,《煙花》呢套動畫電影同廿幾年前嘅「原作」可以話係兩套完全唔同嘅作品黎,前面提到雖然部份設定相同,但係最終想做嘅方向完全係兩回事。
比起「原作」最終剩下嘅唏噓同無奈,個人比較喜愛動畫嘅誇張手法同埋主角嘅敢想敢做,
都係嗰句,可能我唔係嗰個年代嘅人,我係比較buy呢個動畫版多啲。
以電影嘅角度黎睇,個人覺得呢套戲真係唔差,川村元氣今次都無令我失望,再一次做咗一套非常正嘅作品出黎。
最後必須強調一點:呢套唔係《你的名字。》,兩套作品所做嘅事同埋表達嘅嘢完全唔同,難以相提並論,切勿將兩套作品拎黎做比較。
川村元氣亦有強調呢套作品嘅企劃其實早喺製作《你的名字。》之前已經想做。
------------------------------------分界線------------------------------------
基於過唔到心理關口,最後都係決定寫埋自己對動畫結局嘅見解。
(以下為個人推測,並非全部內容均為正解,含劇透,適合已觀看此片之人士閱讀)
故事看似回到過去改變一切,實際上係進入咗「如果世界」,呢點小說嘅分段標題有出到黎,每一次嘅扔波其實係再進入咗另一個「如果世界」。
動畫喺典道進入「如果世界」之前,小薺曾經問過典道『你知道點解我會覺得你當時會贏嗎?』(指游泳比賽時),
而咁啱再之前有幕就係小薺喺locker度望到個玻璃球閃咗一閃,再加上後面小薺講到『我明白自己係無辦法走得甩』,
因此亦可以推測為小薺曾經有用過個玻璃球進入過「如果世界」。
[小說亦沒有交代過小薺有否使用過玻璃球]
而典道每次進入「如果世界」世界之後其實係無咗cover嗰段時間前嘅記憶(類似覆寫),佢係要經過多個step之後先會完全勾翻起嗰啲記憶,
所以動畫特別喺典道重捨記憶時回放翻之前嘅重點畫面出黎,
如果無睇過小說嘅話係會難以理解點解動畫會咁樣剪法,更加唔明白點解"Reset"完之後典道好似咩行動都異常地慢半拍咁。
之但係動畫最後一次進入「如果世界」嗰陣典道係完全保持翻之前兩次進入「如果世界」前後嘅記憶,
因此嗰個moment動畫用左典道精神恍惚嘅手法表達呢件事,並唔係暗示典道就黎GG。
動畫喺最後一次嘅「如果世界」將茂下所有物件都整到好似佈下結界咁,再加上尾段個醉酒煙花技師執起個玻璃球時比之前嘅size大好多,
個人有諗過到底會唔會係個玻璃球所造嘅「如果世界」已經到極限所以出現呢個情況。
[無從稽考,小說無呢一段,但係兩者一樣嘅係最後一次「如果世界」個玻璃球已經無可能再回到典道以及小薺手中]
而動畫裏面最後一次「如果世界」嘅最尾,係玻璃球升到天空爆開,玻璃球嘅碎片隨風四散,每塊碎片都展示著每個不同的「世界」。
祐介所執到嘅碎片,係佢有遵守到同小薺嘅約定一同出席煙花大會時嘅「世界」;
此時典道同小薺分別執到唔同嘅碎片,但裏面所展現嘅「世界」係一樣的,係佢地兩個成功私奔到東京後嘅「世界」。
「如果世界」隨即消失,空中爆發著燦爛的煙花。
最後一幕係新學期開始,老師喺班房點名,點名簿上無及川薺,而點到島田典道時典道卻不在課室。
呢個開放式結局可以引黎好多聯想,
我個人嘅解讀係玻璃球爆開時小薺同典道已經搵到佢地一直想要嘅答案,
碎片上嘅「世界」正正就係佢地兩個夢寐以求嘅結果,而二人決心要將呢個「世界」變成現實而唔係只係一個「如果世界」,踏上步向「私奔」嘅旅途。
(至於到底旅途係幾時開始,由咩地點開始,呢層就不得而知了)
------------------------------------分界線------------------------------------
如果你問我《煙花,應該和誰看》呢個譯名點樣嘅話,我會答你:其實都幾貼題。
順帶一提,茂下呢個虛構地名設定,日文發音係もしも,如果將個發音直譯中文,即係"如果"咁解。
循例評分,
劇情&編排:40/50
作畫&場景:13.5/20
配樂:7/10
歌曲:10/10
配音:6.5/10
總分:77分
