<含少量劇透>
睇左全港第一場《爆漫》,
如果以漫畫角度黎講嘅話其實真係幾"有趣",
監督用嘅手法非常特別,令人睇呢套電影嗰陣會感覺到好濃厚嘅漫畫風格,以電影黎講都幾新鮮,
呢套電影劇本同監督由大根仁負責,之前曾經睇過另一套出自佢手嘅漫畫改篇電影《草食男之桃花期》得知佢嘅風格係要未睇過前作/原作嘅都可以直接睇佢嘅電影版。
講翻正題,在下係原作嘅fans,所以對呢套電影或多或少都充滿期待,動畫睇過漫畫亦都睇過,基本上動畫有8-9成都係跟翻晒漫畫去做,只係動畫第三季因為篇幅問題而無奈刪去少量劇情。
到左電影其實都預左唔少位置會有改動,不過佢改動嘅情況有少少超出預期。場景改動嗰啲唔講,主要講主線劇情上嘅大變改。
首先無左香耶呢個角色先,呢樣事前已經知道,
然後原作裏面兩位主角首次連載嘅作品係《疑偵探TRAP》,電影改為原作入面只係出短篇嘅《財智造世界》為首套連載作品,並用佢黎作整套電影嘅骨幹之一。之後連載作品上並無用到「亞城木夢叶」呢個筆名而直接用"原作:高木秋人 作畫:真城最高",筆名呢點喺電影入面連提都無提及過。另外原作講到亞豆兼任配音員一事係獲學校體諒,電影裏面因學校校規而被迫中途退學,亞豆同真城就係咁咁快就被分開....電影亦無提及真城阿叔以前嘅戀人...
好多好多改動不能盡錄,同時亦留翻少少餘地等大家自己發掘啦。
電影雖然有好多改動,但係其實好多位都根據原作而串連翻,
部份情節甚至比原作更"現實化",至少佢真係成功將漫畫製作嘅過程原原本本咁呈現喺你眼前,電影亦有適當地跳過部份時間軸,不過節奏方面可以再掌握得好少少,部份位置其實可以再交代多少少細節。
電影以最高同秋人成功超越新妻成為第一名,同時於高中畢業作完結(詳細唔多講),最後有少少伏筆,如果拍續集唔成問題。
片尾staff list部份別有心思,用一本又一本漫畫並列書側嘅書名及作者部份出劇組工作人員。
道具方面非常有心,每本劇中嘅虛構漫畫都真係整翻實物出黎,雖然有啲可能只係得個書皮,連原稿紙都真係張張大大張咁做晒實物。
選角方面都算合格,有幾個選角可以話適合得黎又唔係好適合,主要睇你清唔清楚演員/角色嘅背景。
主題曲都幾襯托套電影,幾洗腦...
電影主題係圍繞住王道漫畫嘅"友情、努力、勝利"
睇完套電影真係想重新睇多次動畫版,某程度上呢套電影都幾成功可以引人去睇翻原作,如果出續集嘅話會繼續支持。
假如你係原作fans或者睇過動畫嘅話,睇呢套電影之前要做定心理準備去接受佢有多地方嘅改動,只可以話呢樣係大根仁監督嘅風格。
但如果你事前完全未睇過原作同動畫嘅話,直接走去睇呢套電影係完全無問題,分分鐘仲會有好高嘅評價。
最後到評分,
劇情 32/50
道具&特技 18/20
選角 12/20
主題曲 8/10
總分:70分
沒有留言:
張貼留言