[劇透注意!!]
成敗在於劇本，一個本來非常感動的故事
《一週的朋友。》,改編自葉月抹茶同名漫畫,平常有追看動畫的觀眾相信都對這個片名略知一二。
故事主要講述女主角－藤宮香織對朋友的記憶只能夠維持一星期,每到星期一就會重置,
受影響的範圍僅限於同學以及朋友的所有事,家人的記憶並不會消失。
因此,藤宮平日於學校對所有同學的表現都是非常冷淡,甚至非必要都不會開口說話。
而男主角－長谷祐樹對藤宮平日的表現感到好奇,於是渴望能夠和藤宮成為朋友。
----------以下為電影中的情節,怕被劇透者請直接跳過----------
故事以長谷和藤宮在春假時於學校圖書館的邂逅作開始,
高中二年級生長谷因為一張被遺下的圖書證得知原來學校有一名同級的轉校生名叫藤宮香織,
同時間藤宮正到圖書館尋找自己的圖書證目睹整件事。
當日長谷在乘搭鐵路回家的途中因趕著下車而遺留剛於圖書館借下的一本厚書,
剛巧藤宮亦於同一卡車,看見此情況便立即拾下書本,把書拋給剛出車門的長谷。
長谷因為此事而對藤宮產生興趣,開學後得知原來藤宮跟自己被編進同一班,
長谷就此對藤宮的舉動多加留意,並想與藤宮成為朋友。
每次長谷對藤宮說「請跟我做朋友吧」都被拒絕,於是長谷經常都會搞一些小動作吸引藤宮的注意,
班主任老師井上觀察到這個情況便告訴長谷,藤宮因為一次車禍之後對同學和朋友的記憶每逢星期一便會重置,
並勸籲長谷不要再打擾藤宮。不過長谷沒有放棄,而且還想到一個辦法讓藤宮能夠交朋友－交換日記。
之後,他們都會各自在日記上寫上一些有趣的事情,
每逢星期一藤宮於上學前會把日記看一遍以記著自己和長谷是好朋友,上學後會把日記交給長谷,
而長谷會把日記保存至星期五便交給藤宮,以此作一個循環。
這個方法非常有效,二人相處得非常融洽,某日長谷在圖書館想把之前借的厚書續借但忘記帶圖書證,
藤宮更出手用自己的圖書證替長谷借下。
過了一段時間,巧合之下藤宮更跟長谷的好友沙希和死黨桐生成為了朋友。
不過這個關係維持了不久,班上多了一名插班生九條一的來臨,導致這個朋友圈出現了裂縫。
九條和藤宮原來曾經是青梅竹馬的好友,但九條並不知道藤宮會失憶一事,
看見藤宮現在對自己的反應如此冷淡,心裏非常憤怒,因此對藤宮的稱呼是「背叛者」。
文化祭時,藤宮初中時期的另一名好友近藤突然出現在藤宮面前道歉,並說出藤宮之所以會失憶的原因,
九條和長谷亦在場聽著近藤的解釋。
藤宮會失憶固然是因為車禍,但車禍發生的原因是當年九條曾經約藤宮在車禍現場附近相見,
九條因為要搬家轉校希望臨走前能夠得知藤宮對自己的心意,藤宮在赴約途中被剛得知此事的數位同班女同學阻撓,
近藤亦是其中一人,並向藤宮表示「你這個背叛者,千萬不要想著要得到九條」。
藤宮一時害怕不知所措便馬上調頭,意外就在此時發生,藤宮一衝出馬路就被一輛車撞倒。
之後藤宮每逢星期一失憶,是因為這件事無法接受對朋友的信賴和隱瞞而下意識對腦部記憶作出的一種自我保護。
而蒙在鼓裡的九條因為當時未能得知藤宮的答覆,之後又跟藤宮斷了來往,對藤宮產生恨意。
藤宮聽到事件後突然記起此事,同時想立即向九條回應當日的提問。一直安撫藤宮的長谷明白藤宮的心意後只好放手讓她找回九條。
長谷的死黨桐生得悉事件後不作一聲地陪伴著長谷,長谷決定放棄之前與藤宮建立的一切,把交換日記燒毀,
隔週一,藤宮又再次失去了對朋友們的記憶,不同的是,她對九條的記憶並沒有消失。
長谷雖然放下了藤宮,但一直無法忘記二人相處的時間,所以就把兩人相識以及相處的經過用畫圖的方式於之前在學校圖書館借的那本厚書畫下,
畫完之後便交給同為圖書委員的師弟替他還書。
之後長谷沒有再與藤宮接觸,新學年來臨了,他們沒再被分到同一班。
轉眼間,到了畢業的日子,這段期間藤宮一直都跟隨著九條,並沒有記起長谷以及其他人的事。
畢業禮的尾聲,藤宮突然被圖書委員的一條校內廣播叫到圖書館,被指學期尾亦尚欠一本書未還。
藤宮感到疑惑,這時候同為圖書委員的長谷的師弟才後知後覺把之前長谷那本厚書拿出來歸還,
一揭開,發現書裏多個頁面被畫上圖案,藤宮發覺每頁的圖案都有關連,可當作漫畫揭看,
一頁又一頁的圖案釣起藤宮一幕預又一幕的回憶,藤宮終於記起長谷曾經為自己所做的一切,
九條知道後叫藤宮去找長谷吧,於是藤宮便跑了出去尋找長谷。
最後,藤宮對長谷說「一直都要你主動請我做朋友真的對不起,現在開始該由我來說了,『請跟我做朋友吧!』」
------------------分割線------------------
查實呢套電影個劇本真係好有問題,如果要揸到正同原作漫畫相比的話當然更加多問題,所以講左淨係電影有咩問題存在。
小問題就唔多講,睇故唔好駁故,不過啲大問題非常唔合理嘅地方(又或者算係不滿)真係好影響觀感。
首先,事隔多年,點解藤宮一記起左九條嘅事就咩都唔理想即刻搵翻九條同九條喺翻埋一齊?咁一直喺藤宮身邊扶持住佢嘅長谷算係點?
其次,記起九條之後嘅星期一,藤宮嘅記憶點解會只係得翻九條嘅存在而對其他同學/朋友又再失憶?個病好似未醫翻好喎...
雖然話長谷放棄左藤宮而桐生亦都知道,但係沙希呢?佢同藤宮做左朋友藤宮突然間咩都reset左會沙希完全無反應?當其他人死架?
另外,作為死黨,桐生居然會對長谷嘅一切舉動完全無意見同建議?桐生仲要成套戲十個鏡頭有八個都瞓緊覺,死黨個設定呢喂?
仲有,當年九條同藤宮嘅約會,畫面入面其實藤宮喺條直路差兩步路已經行到九條嘅位置,但係九條居然會見唔到?
之後無耐藤宮喺幾步路之外畀車撞倒九條會完全唔知情?正常黎計就算見唔到藤宮就到埗,就算無望見藤宮比車撞,有人畀車撞倒唔係會有救護車到咩?
救護車到嘅時候唔係會有鬼殺咁嘈嘅救護車聲?聽到救護車聲正常唔係應該點都會走埋去睇發生咩事??
再者,一般黎計會唔會可以一本借左成年幾先check到你未還書?期間仲無續借過喎!?仲要畢業禮完晒先走黎開廣播叫人去圖書館?咁有信心啲人仲未走?
都唔講佢做乜畢業禮先走黎點書,正常呢啲嘢會畢業禮先走黎做嘅咩??長谷嘅師弟仲要可以hold住本書成年都未還喺畢業禮竟然有帶埋翻學校都真係神蹟。
最後,電影入面九條一呢個角色非常之死纏爛打,劇本甚至寫到佢係一個非常自私同自我中心嘅人,最後居然會主動叫藤宮去搵翻長谷?
兩小時嘅片長,故事嘅分配真係唔多平均,前半段尚可,後半段真係會覺得有少少拖,
不過拖得黎佢有樣嘢識得做,就係突然急速加快節奏,等你喺睇緊嘅時候唔會諗太多嘢。
老實講其實一開始喺交代故事背景以及設定嘅時候真係做得唔差,甚至比起原作交代得更加好,
一去到後半段嘅超展開開始就成個故事失左控,不合理嘅地方大爆發,畫面上嘅細節問題都已經唔同佢計...
劇本黎計真係完全唔合格,本來最尾嗰幕可以寫得好好,一個感動嘅畫面可以寫得非常動人,可惜被多個不合理嘅情節令到該畫面嘅感動大打折扣。
套戲之所以合格,完全係因為山崎賢人嘅演技、畫面以及場景嘅精緻度同埋山田豐音樂拉翻高啲分。
山崎賢人嘅演技非常出色,令人非常容易投入套戲,川口春奈表演唔算突出,松尾太陽飾演嘅死黨桐生被劇本搞到個角色可有可無,
反而飾演沙希嘅高橋春織表演卻有意想不到嘅驚喜。
山田豐嘅音樂交足貨為電影挽回不少分數,可惜劇本浪費左穿透力高嘅音樂,至於主題曲部份特登搵翻無限機關(スキマスイッチ)獻唱「奏（かなで） for 一週間フレンズ。」亦應加分,
始終首歌亦係精心為電影做翻一次remix,只係套戲唔知咩事無啦啦加插首「奏（かなで）」合唱團版做畢業歌呢個位非常不當。
至於套戲嘅罪魁禍首,莫過於負責寫劇本嘅泉澤陽子。自問今次係第三次睇泉澤陽子寫嘅劇本,前兩次已經領教過泉澤嘅功力係咩level,
第一次係睇《安堂機械人》就算吧,唔算話寫得好差;第二次係睇《IQ246~華麗事件簿~》,人物名同故事設定嚴重抄考《福爾摩斯》都算,劇本一塌糊塗,
結尾更加當觀眾係白痴黎成全佢所謂「246嘅IQ」;第三次就係呢套電影,今次連名正言順可以畀佢由頭抄到落尾都可以搞成咁嘅地步,
俗語話齋「照抄都抄得唔好」,咁就可以睇得出呢位編劇有幾咁成功。
自從睇完《IQ246》之後,見到呢套戲又係泉澤陽子寫劇本已經有少少怕個劇本會好伏,
只係睇完條trailer覺得:應該都唔會差得好緊要呱?話晒都有原作做參照,結果出到黎...
日後見到「泉澤陽子」呢個名真心要三思而後行。
好少可睇完一套戲要寫文寫到咁...不過今季好似無乜特別戲上所以呢少少時間都可以抽出黎做翻個呼籲,
但係有樣嘢應該都要讚吓佢嘅...就係呢套戲都仲算係《一周的朋友。》,而唔係好似《ハルチカ》咁掛羊頭賣狗肉...
如果你話要睇人同睇景靜靜地聽吓音樂嘅話,呢套戲可以滿足到你嘅要求,
但係如果你expect個故事會好精彩嘅話...個方向可能會走錯左...
最後循例評分,
劇情&編排:20/50
畫面&場景:16/20
音樂&主題曲:18/20
選角:6/10
總分:60分
沒有留言:
張貼留言