話說琴日去左睇《當這地球沒有貓》呢套戲,
本應5月中就有得睇但係到最後delay到7月尾先上,
上映左唔夠7日全港就剩翻唔夠10間戲院仲有得睇,認真悲劇。
故事講述男主角係一個無憂無慮,每日負責送信嘅郵差,
放完工翻到屋企,就係照顧佢隻貓。
對自己嘅將來,自己有咩想做,之後要點做,完全無打算過。
某日突然發現自己患上末期腦癌(好似好老土咁),但係發現之後自己卻沒有驚訝,
反而仲非常平靜,只係諗有啲咩應該要做。
翻到屋企就見到一隻魔鬼,魔鬼同佢講第二日就會死,
如果想繼續生存就必須要有一樣野消失黎換取一日嘅性命。
當呢啲野消失嘅同時其他人對呢樣野或者相關事件嘅記憶都會消失。
然後先後消失電話(包括手機)→電影→鐘(包括手錶)。
而呢啲野消失之前同之後嘅時間,
男主角漸漸察覺呢啲看似無關痛癢嘅東西背後原來跟唔同人都有所關連,
一啲可能係好瑣碎嘅事原來正正係同其他人之間嘅一種聯繫。
而故事中最後一樣要消失嘅野就係貓。
男主角並唔想貓消失,與此同時男主角記起自己嘅往事,男主角點解會對隻貓咁執著,
男主角曾經做過啲乜,男主角同屋企人曾經點樣相處,隻貓對男主角黎講係有幾重要...
男主角終於清楚知道自己喺臨死之前想做啲乜,然後把握最後嘅時間,希望將呢件事完成佢。
呢套電影係由同名小說改篇,就故事設定黎講可能會老土左少少,不過對我黎講係幾吸引,
一睇大綱知道呢套戲嘅內容應該幾啱我睇。
電影嘅畫面調色令人睇落好舒服,唔同位置都有適當嘅調色,而且非常唯美,
就近年電影不論係香港、日本、韓國定係西片黎講都比較少見,值得一讚。👍
其實成套電影並無好刻意咁去製造一個高潮位,但係每段卻有著千絲萬縷嘅關連性,睇少左其中一段你都可能會唔知發生咩事。
呢點正正同人嘅一生相同,假如人生當中無發生其中一件事,你嘅人生可能就截然不同。
電影內容非常值得反思,假如你突然知道人生已經走到盡頭,你又會想做啲咩?
每日忙到有氣無頂抖嘅香港人,你會有咩想做?你走了之後,會有誰為你哭泣?
電影配樂有部份出奇地輕鬆,為電影增添不少色彩。
整體評分為85分。
如果邊個睇完呢篇文之後有興趣嘅好快啲去睇啦!!唔知仲有幾多日上家!!好好把握時間呀!!!
(雖然我知應該無幾多個睇呢篇文家啦)
於是喺睇完呢套電影之後,我又繼續去思考人生...
沒有留言:
張貼留言